उपत्यकामा बढ्दै कोरोना जोखिम, नाकाहरुमा गरिएको परीक्षणबाट ३५ बढीमा कोरोना पुष्टि


काठमाडौं : लकडाउन खुलेपछि उपत्यकामा कोरोना भाइरस (कोभिड–१९)को जोखिम बढ्दै गएको छ। लकडाउन खुलेसँगै मानिसको आवतजावत बढ्दा काठमाडौँ उपत्यकामा कोभिड– १९ को जोखिम  बढ्दै गएको हो। 

कोरोना संक्रमणको दर बढ्दै जाँदा यसबाट बच्नका लागि सुरक्षाका उपाय अपनाउनुपर्ने जरुरी देखिदाँ आम सर्वसाधारणले लापरवाही गर्दा जोखिम बढ्दै गएको हो। 

क्रियाशील पत्रकार महिला (डब्लुडब्लुजे)ले शुक्रबार आयोजना गरेको ‘कोभिड– १९ बन्दाबन्दीपछिको अवस्थाः बढ्दो जोखिम र अपनाउनुपर्ने सुरक्षा व्यवस्था’ विषयक भर्चुअल कार्यक्रममा कोभिड– १९ को जोखिमबाट बच्न सुरक्षाका उपाय अपनाउन सुझाव दिइएको छ।
    
काठमाडौँ मेडिकल कलेजको कम्युनिटी मेडिसिन विभागका प्रमुख डा. सुनीलकुमार जोशीले राजधानीमा समेत बढिरहेको कोरोनाको जोखिममा समुदायले आफैँ सुरक्षाको व्यवस्था गर्नुपर्ने सुझाव दिए।    

‘कोभिड १९ नयाँ रोग भएकाले यस रोगको विशेषज्ञ कोही पनि नभएको र ठाउँअनुसार यसको स्वरुप र लक्षणसमेत फरक देखिएको छ, मास्क लगाउनु, साबुन पानीले हात धुनु वा ७० प्रतिशत अल्कोहल भएको सेनिटाइजरले हात धुनुपर्छ’, डा जोशीले भने, ‘कम्तीमा एक मिटरको दूरी राख्नु र पर्याप्त हावाको आवागमन हुने स्थानमा बस्नु यसबाट बाँच्ने उपाय हो।’
    
प्रत्येक दोस्रो व्यक्ति कोरोना लागेको सम्झेर सबैले आफ्नो सुरक्षा व्यवस्था गर्नुपर्ने सुझाव दिँदै उहाँले रोग लागेपछि उपचार नभएकाले लाग्न नदिनुतर्फ ध्यान दिनुपर्नेमा बन्दाबन्दीपछि धेरैले सुरक्षा सतर्कता नअपनाएकाले पनि जोखिम बढेको बताए। 

काठमाडौँ मेडिकल कलेजमा आएका नशाका बिरामी र सुत्केरी महिलाको शल्यक्रिया गरी घर पठाएपछि उनीहरुमा कोभिड– १९ भएको पुष्टि हुँदा सबै डराएर ४०० भन्दा बढी स्वास्थ्यकर्मी र सहयोगीको पीसीआर गर्दा एक जनालाई पनि कोरोना नभएको अनुभव डा जोशीले सुनाए। 

कोरोनाको औषधि नभएको अवस्थामा बिरामीलाई भएको अरु दीर्घ रोगको औषधि दिनुका साथै नियमितरुपमा मानसिक परामर्श, मनोरञ्जनको व्यवस्था, इन्टरनेटको व्यवस्था गर्नुपर्ने उनको भनाइ छ।

पछिल्लो २४ घन्टाको अवधिमा उपत्यकामा थप ३८ जनामा कोरोना संक्रमण पुष्टि भएको छ। विभिन्न प्रयोगशालामा गरिएको परीक्षणमा थप ३८ जनामा कोरोना संक्रमण देखिएको छ।

काठमाडौंका ३२,ललितपुरका ५ र भक्तपुरका १ जना गरी ३८ जनामा कोरोना संक्रमण देखिएको हो।  बिहीबार मात्र  काठमाडौंका ४१, भक्तपुरका २ र ललितपुरका २ जना गरी ४५ जनामा कोरोनासंक्रमण देखिएको थियो।  रासस  


Comments

comments