किपुल्चाया धंयाः पितब्वज्या

12

चन्द्रागिरि, चिल्लागा अष्टमी । नेवाःतय्गु ऐतिहासिक बस्ती किपुल्चा ९किसिपिडी० या अमूर्त संस्कृतिया बारय् मय्जु तेज माया महर्जनं च्वयादीगु अनुसन्धानमूलक नेपालभाषाया सफू ‘किपुल्चाया धंयाः’ शुक्रवाः किपुल्चाय् मूपाहाँ संस्कृतिविद् सत्यमोहन जोशी व चन्द्रागिरी नगरपालिकाया मेयर विशेष पाहाँ घनश्याम गिरीं मंका कथं पितब्वज्या यानादीगु खः । उगु सफुतिइ किपुल्चाया ऐतिहासिक, सांस्कृतिक, भौगोलिक, धार्मिक, सामाजिक पक्षयात कुलातःगु खःसा किपुल्चाया सायाःया बारेय् दुग्यंक कुलातःगु नेपालभाषा केन्द्रीय विभागया निवर्तमान प्रमुख सहप्राध्यापक नापं समीक्षक तुल्सीलाल सिंह कनादिल । च्वमि मय्जु तेज माया महर्जनं नुगः खँ तयेगु झ्वलय् धंयाः धैगु सायाः खः, थुगु जात्रा मेथाय् स्वयां बिस्कं पहः खनेदु धयादिल । थुकिया संरक्षणया नितिं लिपिबद्ध यायेगु झ्वलय् थम्हं थुगु अमूर्त संस्कृतिया बारय् अध्ययन यानागु खः धकाः धयादिल । विशेष पाहाँ चन्द्रागिरी नगरपालिकाया मेयर घनश्याम गिरीं थुगु नगरपालिका दुने किपुल्चां बिस्कं पहःयागु संस्कृतियात म्वाका तःगु खनेदु । थुकियात लिपिबद्ध याःगु बांलाःगु खँ जूगु धयादिल । थथेहे नगर दुनेया मेमेगु बस्तीया नं अध्ययन यायेमाःगु खँ नं धयादिल । अथेहे मूपाहाँ जोशीजूं थुगु लागा स्वनिगलय् न्हापां बस्ती जूगु थाय् खः धयादिल । थन लिच्छविकालिनया तःगूमछि पुरातात्विक अभिलेख व ल्वहंपौत संरक्षण व संकलन यायेमाःगु व नापं थुगु थाय्या विशेष अध्ययन यायेमाःगु खँय् बः बियादिल ।
द्वारे माहां पुचःया ग्वसालय् हिराकाजी महर्जनं न्ह्याकादीगु उगु ज्याझ्वः किपुल्चाया द्वारे हर्क बहादुर महर्जनया नायःसुइ जूगुलिइ तुल्सी महर्जन, कृष्ण महर्जन, नेपालभाषा केन्द्रीय विभागया प्रमुख सह प्राध्यापक सृजना प्रधान, विभागया शिक्षकपिं डा। तुयु बहादुर महर्जन, जीवन कुमार महर्जन, शरद कसाः, राजित बहादुर श्रेष्ठ, हलिं नेवाः गुथिया शान्तदास श्रेष्ठ लगायतया पिसं ब्वति कयादीगु खः । चन्द्रागिरी नगरपालिका वडा नं ५ या वडा नायः कान्छा भाइ महर्जनं लसकुस न्वचू तयादिसे चन्द्रागिरी नगरपालिकाया आर्थिक गुहालिं पिदंगु थुगु सफू किपुल्चा त्वाःया छेँखा पतिं थ्यंकेगु खँ नं धयादिल ।
बुखँ स् जीवन कुमार महर्जन
किपा स् नेवाः सूचना केन्द्र



Comments

comments