युएई विरुद्ध पारसको शतक, एक दिवसीय अन्तर्राष्ट्रिय क्रिकेटमा नेपाली खेलाडीको पहिलो शतक


दुबईमा जारी एक दिवसीय अन्तर्राष्ट्रिय श्रृंखलाको तेस्रो तथा निर्णायक खेलमा नेपालका कप्तान पारस खड्काले शतक प्रहार गरेका छन् । यो शतक एक दिवसीय अन्तर्राष्ट्रिय क्रिकेटमा कुनै पनि नेपाली खेलाडीको पहिलो शतक पनि हो ।

पारसले ९६ बलको सामना गर्दै १३ चौका र १ छक्काको मद्दतमा आफ्नो शतक पुरा गरेका हुन् । १९ रनको क्षतिमा विनोद भण्डारीलाई गुमाएपछि क्रिजमा आएका पारसले उपकप्तान ज्ञानेन्द्र मल्ल (३१ रन) को राम्रो साथ पाए ।

दिपेन्द्र ऐरी (६ रन), पहिलो खेल खेलिरहेका सन्दिप जोरा (१९ रन) र रोहित पौडेल (१६ रन) छिट्टै आउट भएपनि एक तर्फबाट पारसले नेपालको इनिङ्स सम्हालिरहेका छन् ।

अहिले आरिफ शेख ४ रनसहित क्रिजमा छन् भने ३४ ओभर खेलिसक्दा ५ विकेटको क्षतिमा नेपालको १ सय ९३ रन रहेको छ ।

टस जितेर पहिले फिल्डिङ गर्ने निर्णय गरेको नेपालले २ सय ५५ को लक्ष्य पाएको छ । सुरुवातमा राम्रो तथा कसिलो बलिङ गरे पनि पछिल्लो १५ ओभर नेपालको लागि खर्चिलो सावित भयो । बलिङतर्फ पनि पारसले २ विकेट लिएका थिए ।


Comments

comments