सर्वाधिक लोकप्रिय नेपालभाषा चलचित्र सिलुको शीर्षक गीतको कभर भिडियो सार्वजनिक भएको छ । नेवाः कला, संस्कृति, भाषा, सम्पदाको संरक्षण र प्रबर्द्धनार्थ सामाजिक सञ्जालबाट काम गर्दै आएको ‘वी नेवार्स’ समूहद्वारा निर्मित कभर भिडियो मंगलबार सार्वजनिक गरिएको हो ।
सिलु कभर भिडियोको निर्देशन रीतु दर्शनले गरेका छन् भने भिडियो नृत्य निर्देशन, अवधारणा उनै दर्शनले गरेका हुन् । स्वयंम् रीतु दर्शन सहित आशिष महर्जन, विवेश महर्जन, दिप बन्धन महर्जन, योन्सन महर्जन, निर्जला महर्जन, रश्मि श्रेष्ठ, जेनि श्रेष्ठ, विकल महर्जनको अभिनय रहेको यस कभर भिडियोको छायांङ्कन र सम्पादन डेसुम महर्जन र बिक्सन महर्जनले गरेका हुन् ।
१९८७ नोवेम्बरमा रिलिज भएको नेपालभाषाको पहिलो चलचित्र सिलुको निर्देशन प्रदिप रिमालले गरेका हुन् । प्रेम बाँनिया र दान बहादुर महर्जन निर्माता रहेको यस चलचित्रको लेखन देव बहादुर रञ्जित ‘मोति’ र प्रेम बाँनियाको रहेको छ । मूख्य भूमिकामा जय श्रेष्ठ र नविना श्रेष्ठ रहेको यस चलचित्रमा वरिष्ठ हाँस्यव्यंग्य ‘मह’ जोडी कलाकारद्वय मदन कृष्ण श्रेष्ठ र हरिवंश आचार्यको पनि भूमिका रहेको छ । चलचित्रको शीर्षक गीतमा जुजुकाजी रञ्जित र रचना जी.सीको स्वर रहेको छ ।
नेपालभाषामा ‘सिलु’को अर्थ गोसाँईकुण्ड तीर्थ हो । किम्बदंती अनुसार नेवाः परम्परामा श्रीमान श्रीमति सँगै गोसाँईकुण्ड जानु हुँदैन, यदि श्रीमान श्रीमतीसँगै गयो भन्ने उनीहरूको सम्बन्ध टुट्छ भन्ने मान्यता छ । चलचित्र सिलुमा मुख्यपात्र नायक (श्रीमान) आफ्नो साथीहरूसँग सिलु जान लागेको हुन्छ, त्यही बेला नायिका (श्रीमती) पनि आफ्नो श्रीमान सँग सिलु जाने भनेर जिद्दी गरेर जान्छिन् । त्यही सरोफेरोमा यो चलचित्र निर्माण भएको हो । सो समयदेखि हालसम्म पनि चलचित्रलाई निकै मन पराइएको छ ।
प्रत्येक वर्षको जनै पुर्णिमाको दिन गोसाईकुण्डमा मेला लाग्ने गर्दछ । सो मेलामा काठमाडौंबाट पनि धेरै भक्तालुहरु पुग्ने गरेका छन् ।
