पत्रकार छायाचन्द्रको जिउधनको रक्षा गर्न प्रगतिशील पत्रकार संघको आग्रह

काठमाडौँ । प्रगतिशील पत्रकार सङ्घ, नेपालले न्युज अभियान डट कमका सम्पादक छायाचन्द्र भण्डारीको जिउधनको रक्षा गर्न आग्रह गरेको छ ।



jibss

सङ्घका संयोजक श्यामलाल पोखरेलको हस्ताक्षरमा २०७९ भदौ ६ गते सोमबार जारी प्रेसवक्तव्यमा यस्तो आग्रह गरिएको हो ।

प्रेसवक्तव्यमा भयरहित वातावरणमा समाचार लेख्ने वातावरण बनाउन तथा पत्रकार छायाचन्द्र भण्डारीलाई ज्यान मार्ने धम्की दिएको सन्दर्भमा निष्पक्ष छानबिनको माग गरी दोषीउपर कारबाहीको माग गरिएको छ ।

यस्तो छ, प्रेसवक्तव्यको पूर्ण पाठ :
“न्युज अयिभान डट कमका संस्थापक सम्पादक छायाचन्द्र भण्डारीलाई प्रहरी एक जना प्रहरी अधिकारीले समाचार लेखेकै आधारमा ज्यान मार्ने धम्की दिएको घटनाप्रति प्रगतिशील पत्रकार सङ्घ, नेपालको ध्यान आकर्षण भएको छ ।

संविधानमा नै पूर्ण प्रेस स्वतन्त्रता जस्तो अधिकार लिपिबद्ध गरिएको हाम्रो देश नेपालमा एक जना प्रहरी अधिकारीले समाचार लेखेकै भरमा ज्यान मार्ने धम्की दिनु निन्दनीय भएको प्रष्टै छ । समाचारको सम्बन्धमा हुन जाने त्रुटिको नियमन गर्नका लागि अधिकारसम्पन्न नियमनकारी निकाय प्रेस काउन्सिल जस्तो संस्था देशमा क्रियाशील रहिरहेकै अवस्थामा यस खालको घटना घट्नुले समग्र प्रेस जगत् तथा सिङ्गो देशलाई चिन्तित तुल्याएको छ ।

यस सम्बन्धमा हाम्रो सङ्गठन निम्न विषयमा ध्यान दिन प्रशासनसित अनुरोध गर्दछ :

१. देशमा निष्पक्ष र भयरहित वातावरणमा समाचार लेख्ने वातावरण कायम गरिनुपर्दछ ।

२. उपर्युक्त घटनाको निष्पक्ष छानबिन भएर दोषीमाथि कानुनानुसार कारबाही हुनुपर्दछ ।

३. पत्रकार छायाचन्द्र भण्डारी र निजका परिवारको जिउधनको रक्षा हुनुपर्दछ ।”

न्यूज अभियान डट कममा २०७९ साउन २९ गते आइतबार “पद बचाइदिनेको सिफारिसमा आई.जी.पी. सिंहले दिए चुडाललाई दरबारमार्ग वृत्तको जिम्मा” शीर्षकको समाचार प्रकाशन भएको थियो । सोही विषयलाई लिएर नेपाल प्रहरीको दरबार मार्ग वृत्तका प्रमुख प्रहरी नायब उपरीक्षक (डिएसपी) कोपिला चुडालले सो अनलाइनका संस्थापक सम्पादक भण्डारीलाई टेलिफोनबाट ज्यान मार्ने धम्की दिएको निजकी पत्नी टुकामाया भण्डारीले जानकारी दिनुभएको थियो । उहाँले यस सम्बन्धमा भदौ ५ गते राष्ट्रिय मानवअधिकार आयोगमा उजुरीसमेत दिनुभएको थियो ।

पारिवारिक श्रोतका अनुसार डिएसपी चुडालले दरबार मार्ग वृत्तको अफिसियल मोबाइल नम्बर प्रयोग गरी पत्रकार भण्डारीलाई ‘तपाईंका लागि मैले एउटा गोली खर्च गर्न सक्छु । जुनसुकै बेला म तपाईंको ज्यान लिन सक्छु । हेक्का राख्नुहोला’ भनेर धम्की दिएको बताइएको छ ।

सो धम्कीका कारण पत्रकार भण्डारी लुकेर हिँड्नुपरेको तथा उनका पत्नी र छोरीहरू मानसिक तनावमा रहेको राष्ट्रिय मानव अधिकार आयोगमा प्रस्तुत गरिएको उजुरीमा उल्लेख छ ।