काठमाडौं, साउन १६ – चन्द्रागिरि नगरपालिकाको वडा नं. १ कार्यालयले आफ्नो वडालाई बालश्रम मुक्त घोषणा गर्ने तयारी सुरु गरेको छ। यसै सन्दर्भमा वडा कार्यालयले एक सूचना जारी गर्दै वडाभित्र रहेका सम्पूर्ण घर, उद्योग, व्यवसाय तथा कलकारखानाहरूलाई बालबालिकालाई श्रममा नलगाउन आग्रह गरेको छ।
वडा कार्यालय दहचोकबाट जारी सूचनामा बालश्रमलाई निरुत्साहित गर्दै वडालाई बालश्रममुक्त क्षेत्र बनाउन लागिएको उल्लेख छ। साथै, सूचनामा यदि कुनै पनि व्यक्ति वा संस्थाले बालबालिकालाई श्रममा लगाएको पाइएमा प्रचलित कानुनबमोजिम कडा कारबाही गरिने चेतावनी समेत दिइएको छ।
बालश्रम अन्त्य गर्ने अभियानमा वडाको पहल!
यो कदमलाई वडाभित्रका बालबालिकाको भविष्य सुनिश्चित गर्ने र उनीहरूलाई शिक्षाको अधिकारबाट वञ्चित हुनबाट रोक्ने महत्त्वपूर्ण पहलका रूपमा हेरिएको छ। बालश्रमको प्रयोगले बालबालिकाको शारीरिक, मानसिक र शैक्षिक विकासमा नकारात्मक असर पार्ने भएकाले यसको अन्त्य गर्न वडाले सक्रियता देखाएको हो।
चन्द्रागिरि नगरपालिकाको का. वडा अध्यक्ष केशव गिरीका अनुसार, “हामीले वडालाई ‘ऐतिहासिक, सांस्कृतिक नगरी समृद्ध पर्यटकीय चन्द्रागिरि’ को रूपमा विकास गर्ने लक्ष्य लिएका छौँ, र यसका लागि बालबालिकाको अधिकारको संरक्षण पहिलो शर्त हो। यस अभियानमा सबै वडावासीको सहयोगको अपेक्षा गरेका छौँ।”
यस सूचनाले वडा कार्यालय आफ्नो जिम्मेवारीप्रति गम्भीर रहेको र यसलाई बालमैत्री वडा बनाउन लागिपरेको सन्देश दिएको छ। बालश्रमसम्बन्धी समस्या नेपालमा व्याप्त रहेकाले स्थानीय तहबाटै यस्तो पहलकदमी हुनु सकारात्मक कदम मानिन्छ।
